Материалдарды жіберу
Авторларға арналған ережелер
Журнал редакциясына ұсынылатын ғылыми мақала МЕМСТ 7.5-98 «Журналдар, жинақтар, ақпараттық басылымдар. Жарияланатын материалдарды баспаға рәсімдеу», МЕМСТ 7.1-2003 «Библиографиялық жазба. Библиографиялық сипаттама. Құрастырудың жалпы талаптары мен ережелері» негізгі баспа стандарттарына сай рәсімделеді.
Журналдың кезекті санына бір автордың бір ғана қолжазбасы немесе сол автордың тең авторлар ұжымы құрамында бір қолжазбасын ғана жариялауға рұқсат етіледі.
Ұжымдық мақала авторларының саны 3-тен аспауы қажет.
Журналға жіберілетін қолжазбалар бұрын жарияланбаған болуы тиіс.
Журналдарды шығару мерзімділігі - жылына 4 рет (тоқсан сайын).
Қолжазба редакцияға электронды нұсқада ғылыми журналдың ресми сайты арқылы жолданады. Қолжазбаның редакцияға жіберу үшін журналдың ресми сайтында тіркеуден өту қажет.
Қос рецензиялау (жасырын) рәсімін жүзеге асыру үшін авторлардан мақаланың екі нұсқасын: біріншісі – жеке деректерді көрсете отырып, екіншісі – жеке деректерді көрсетпей жіберу қажеттілігі сұралады. Жасырын рецензиялау қағидаты бұзылған жағдайда мақала қаралмайды.
Журналдың редакция алқасы қолжазбаның талаптарға сәйкестігін (қолжазбаны ресімдеу) формальды тексеру кезінде Шәкәрім университетінің жазылымымен қамтамасыз етілген плагиатқа қарсы тексеру жүйесі арқылы қолжазбадағы өзге біреудің мәтінін сілтемесіз көрсету фактілерінің бар-жоғы тексеріледі. Плагиатқа қарсы тексеру жүйесі арқылы жүргізілген тексеру нәтижелері бойынша бірегейлігі кемінде 75% болатын қолжазбалар әрі қарай рецензиялауға жіберіледі.
Редакция мақалаға әдеби және стилистикалық өңдеу жасаумен айналыспайды. Талапқа сай рәсімделмеген мақалалар жарияланымға қабылданбайды және авторларға қайтарылады. Мақаланың соңғы нұсқасының алынған күні оның редакцияға түскен күні болып саналады.
Қолжазбаны жариялауға қабылдау туралы шешім рецензиялау рәсімі өткізілгеннен кейін қабылданады.
Қолжазбаны рецензиялау жасырын түрде жүргізіледі, авторға рецензенттің аты – жөні, ал рецензентке мақала авторының аты-жөні мәлім болмайды.
